Lamentations 3

1Ena badu hekwadi-auna hisihisina lalonai,
hisi vada na ani;
2dibura ai vada e lulugu vareai,
asi diarina gabuna ai;
3momokani, ia imana na lau ihadikagu totona
vada e abia isi loulou, dina idoinai.

4Hidiogu bona kopigu vada e ha-oredia,
bona turiagu vada e hakwaidudia;
5vada e kougu ahu, vada e govagu ahu,
lalo-idita ai bona lalo-hisihisi ai;
6dibura ai vada e hanohogu,
idau nega ai e mase taudia na heheto.

7Vada e magugu heḡeḡe, asi egu roho-mauri dalana,
auri metaudia ai vada e ḡuigu;
8na boiboimu, na tai lolomu, ta ese baine kahagu totona,
a ia ese egu ḡuriḡuri e laoa ahumu;
9e utu nadidia amo egu dala vada e koudia,
egu raka daladia vada e hagagevadia.

10Egu ai ia na e banimu beana na heto,
e komumu, leona na heto;
11egu dala amo e hakaugu siri, e daregu patapata,
vada e habaiagu;
12ena peva e marea,
baine tarakia ḡauna ai e halaogu.

13Ena diba pauana dibadia amo,
nadinadigu na e tarakidia;
14bese iboudiai ese e kirikirilaigumu,
edia ane ai e hevasehalaigumu dina idoinai;
15lalogu na vada e ha-iditaia ḡuḡuru,
ava iditana amo vada e hahonugu.

16Isegu na nadinadi e hagaualaidia,
kahu ai vada e hagorugu diho;
17laumagu na maino ai e dabumu,
moale vada na reaia;
18taunabunai lau na tomamu: Hairaigu vada e boio
bona egu helaro Iehova ena amo danu.

19Egu hisihisi bona egu lalo-idita ba ialo tao,
ava iditana bona muramura iditana danu;
20laumagu ese e haeroa louloumu,
bona lalogu ai e igo dihomu;
21a ina na na laloa unemu,
taunabunai na helaromu.

22Iehova ena mia-hanaihanai lalokauna na se oremu
ena hebogahisi karadia na asie dokomu;
23daba iboudiai idia na mamatamata;
emu heabidadama na bada herea.
24Laumagu na e tomu: Iehova na lau ahugu;
una dainai ia baina laroa.

25E nariamu taudia na Iehova ese e hanamodiamu,
bona e tahuamu taudia danu.
26Iehova ena hahemauri baita naria, asi reḡereḡeda,
una na namo;
27tau ta ese eregabena ai maduna baine huaia,
una danu namo.

28Maduna na pagana ai vada e atoa negana ai,
ia na sibona baine helai, asi reḡereḡena;
29uduna na ḡahu ai baine atoa,
reana helaro do baine vara;
30vahana na hebota tauna baine mede henia,
ḡonaḡona herevadia ai baine honu.

31Badina be Ḡaubada ese basine negea daure
ela bona hanaihanai;
32ena be lalona baine hahisia, to baine bogaia hisi,
ena hebogahisi bada-hereana heḡereḡerena;
33badina be taunimanima natudia tau-anidia eiava lalodia
ihahisihisidia na se uramu.

34E ḡuidia taudia iboudiai tanobada ai
bae moidia tao,
35eiava tau ta igwaurai-maorona bae laoa ahu
Dirava Herea-Mikamika vairanai,
36eiava tau ta ena gini-kau dalana bae hagagevaia;
una kara na Ḡaubada ese se abi daemu.

37Daika na e haheḡani bena anina e vara,
Ḡaubada na se gwau maoro negana ai?
38Dirava Herea-Mikamika uduna amo
namo bona dika na e maimu ani?
39Mauri tauna baine maumau badina be dahaka?
Ena dika davana iabina baine maumauraia anina be dahaka?

40Eda dala baita tohodia bona baita tahudia,
bena Iehova baita lou henia;
41laloda bona imada baita abidia isi,
guba ai e nohomu Diravana enai, baitato,
42Ai na vada a kerere bona vada a gwau edeede,
bena oi ese emai dika so gwau tao.

43Badu vada o rioa, vada o hahavamai,
vada o alamai mase, so bogamai hisi;
44ori vada o rioa,
ḡuriḡuri ta basine hanai helaoreana.
45Oi ese kopikopi bona momoru ai vada o halaomai,
bese idau-idau bogaragidiai.

46Ai inaimai iboudiai ese
e ḡonaḡonalaimaimu;
47gari bada bona hekwakwanai na latamai ai vada e kau,
hahevahu bona hahebua-tari danu;
48iruru-matagu na e arumu sinavai na heto,
egu bese kekenina ena mase dainai.

49Iruru-matagu bae diho asi dokona,
bona asi komadana,
50ela bona Iehova na guba amo baine roha dobi,
bena baine itagu;
51matagu ese e hahisihisigu,
egu hanua ulatodia iboudiai vada e dika dainai.

52Asi badina e inai henigu taudia ese e tahugu,
labana tauna ese manu e tahuamu na heto;
53maurigu ai guri lalonai e tahogu dobi,
bona nadi na latagu ai e taho kau;
54ranu ai na mutu, nato
“Vada name boio”.

55Iehova e, oi ladamu na hahanea,
guri dobudobu amo;
56egu noinoi, nato “Hekaha na noiamu, taiamu na egu ai basio koua ahu” na
oi ese vada o kamonai;
57na boi henimu negana ai o raka kahira,
oto “Basio gari”.

58Ḡaubada e, oi ese egu ginikau gabuna vada o lailaia,
oi ese egu mauri vada o rauaia.
59Iehova e, oi ese vada o itaia, e kara dika henigu;
ba hahemaoro henigu.
60Oi ese edia dava-heni idoinai vada o itaia,
lau ihadikagu karadia e lalo-hadailaimu ḡaudia iboudiai.

61Iehova e, edia heḡonaḡonalai herevadia vada o kamonai,
lau ihadikagu karadia e lalo-hadailaimu ḡaudia iboudiai;
62e ala-ala henigumu taudia ududia bona edia lalo-hadai ese
lau e hadikalaigumu dina idoinai.
63Edia helai diho bona edia tore isi a itaia;
edia ane ai e hevasehalaigu.

64Iehova e, oi ese davadia ba henidia,
idia imadia ḡaukaradia heḡereḡeredia;
65oi ese lalodia ba haduhudia,
emu heuduguirai na latadiai baine kau.
66Iehova e, oi ese badu ai ba hahavadia,
emu guba henuna amo ba habuadia tari.